احنا عايشين ليه
؟
سؤال متكرر ومحير
هل علشان نأكل ونشرب ونلبس ونشتغل ونخلف ونموت
. بس كده.. وبعدين ايه الهدف يعني؟
لازم تعرف الهدف من حياتك.. ربنا سبحانه وتعالى قال.. { وَمَا خَلَقْتُ الْجِنَّ وَالْإِنْسَ إِلَّا لِيَعْبُدُونِ } ..
انت اتخلقت للعباده.. والدنيا دي دار ابتلاء ومحطه قصيره جدا في مشوارك.. علشان ياتنجح فيها وتوصل للجنه يتفشل وتدخل النار عافانا الله وإياكم..
دي اول حاجه لازم تعرفها
تاني حاجه.. هيجي في بالك ان هل معنى كده اننا نفضل خايفين ومرعوبين ومنتمتعش بالدنيا يعني..؟
لا طبعا
انت ممكن تستمتع بالدنيا وتاخد ثواب في نفس الوقت.
هتقولي ازاي ده؟
هقولك
.. اهم حاجه استحضار النيه.. مادام عرفت الهدف من حياتك يبقى كل حاجه هتبقى مختلفه..
مثلا.. هتيجي تاكل الاكله..هتتبسط وتتلذذ عادي بس نيتك تكون علشان تحفظ امانه الجسد اللي ربنا ادهالك..
لما تيجي تنام.. تنام بنيه انك تريح جسمك وتقوم لصلاه الفجر..وهكذا في كل حاجه في حياتك اليوميه..
طيب على فكره لو فكرت في حياتك كده هتعيش مبسوط وسعيد وبجد
ولو معملتش كده مش هتشوف سعاده حقيقيه في الدنيا ... هتقولي ازاي بقى؟
هقولك
تخيل العكس..
لو اكلت اكله.. هتبص لاكله او نوع افضل منها علشان تتلذذ اكتر.. لأنك فقدت الشعور الحقيقي بقيمه الاكل ... نفسك مش هتسكت.. دايما هتطلب الأعلى فالاعلي واللي كان عجبك خلاص نفسك مبقتش عايزاه.
وهكذا في كل نعمه هتكون عندك.. هتقول لا زهقت منها عايز الأحسن..
هتيجي في لحظه تفقد السيطره على نفسك وتطلب الغريب والعجيب وتوديك للمعاصي والشهوات وتعوم في طريق الضلال ونفسك سايقاك وانت ولا حول ولا قوه...
لكن لو عارف هدفك من الحياه هتبقى ماسك زمام نفسك وسايقها مش هي اللي سايقاك..
لتمر الحياه وتنتفع بها وتاخد اللي احتاجته منها لاخرتك.. لتصل الي جنات النعيم والفلاح الحقيقي والسعاده اللي من غير تعب ولا شقاء..
طيب هتقولي تمام انا مقتنع بكلامك..
طيب ازاى يبقى جوايا الدافع والقوه والهمه اللي تخليني امشي في طريقي لربنا ومزهقش وارجع تاني للعبث اللي عايش فيه..
وأنا هجاوبك
وهنعرف ازاي بس في الدرس
#السائرون_الي_الله
#حي_على_الفلاح
#مراجعه
الرئيسية 
