ثاني دروس تزكيه النفس
ازاي يبقى عندي الرغبه والعزيمه اني اقاوم نفسي ورغباتي وامشي في طريق الالتزام؟
كلنا بنعاني من اعراض الملل والفتور من العباده
ولو التزمنا شهر نرجع نحس بالملل ونرجع تاني نبعد
إزاي يبقى في قلبنا فيه حافز او اراده او همه او رغبه أو عزيمه .. دايما شغاله ومش بتروح ولا تخلص
اولا.. هل ممكن الرغبه والعزيمه دي تيجي لحد بدون سبب؟
ايوه ممكن ربنا يقذف في قلبنا الباعث والهمه للالتزام..
اكيد حد مننا كان يعرف واحد كان غير ملتزم تماما لاصلاه ولاصوم ولا ولا.. وفجأه في يوم وليله بقى واحد تاني خالص.. سبحان الله.. ألقى الله في قلب عبده حب الإيمان بدون مقدمات..
بس دي حالات نادره..
مينفعش نقول خلاص هفضل زي منا لحد مربنا يهديني من عنده..
افرض مجالكش الباعث جواك ده لحد مالعمر فات ودنيتك انتهت..وجيه يوم الحساب هتعمل ايه ساعتها
..
علشان كده لازم نأخذ بالاسباب ونشوف المفروض نعمل ايه.؟
مش نتواكل على الله ونقول اصل مستني ربنا يهديني..
عملت ايه علشان ربنا يهديك؟
هنقول الأسباب اللي تعلي الهمه وتزود العزيمه والرغبه وتخلي نفسك تتحرك وتثبت على كده بإذن الله تعالى
هما ٣ حاجات مفيش غيرهم
اولا الترهيب...
ورغم انه كلام صعب بس لازم كل شويه نفكر نفسنا بيه
لما نلاقي نفسنا عايزه تودينا للمعاصي..
لازم نفكرها
.. ان احنا أخرتنا حفره مترين في مترين..
هنسيب كل اللي بنتصارع عليه في دنيتنا من مال وأولاد وأطماع.. وبعد كده في عذاب قبر وفي حساب وفي صراط وفي جهنم وفي حر جهنم.. وفي وقوف بين يدي الله سبحانه وتعالى... هتقدر على كل ده ؟
حر جهنم ده هتقدر عليه ازاي؟
ده لما درجه الحراره بتعدي ال٤٠ بنبقي مش قادرين...
امال هنعمل ايه هناك.. يارب قنا عذاب النار🤲
علشان نفهم ليه القرآن الكريم في أيات كتير جدا قويه عن العذاب... ماشيه مع آيات النعيم للمؤمنين
علشان نفسنا لازم ترتدع كل شويه ..لازم نعيش بين الخوف والرجاء... ولاتأمن على نفسك
(كل متلاقي نفسك مش قادر تسيطر عليها اسمع سوره{ق} .. هتشوف جهنم قدامك رؤيه العين) ..
ثانيا الترغيب...
اللي بيحرك الإنسان الخوف او الطمع..
استعرضنا الخوف في الترهيب
ودلوقتي هنطمع النفس ونرغبها..
فلما نفسك تشتاق لحرام قولها ببساطه ان مفيش احلي من حلال الجنه ونعيم الجنه وقصور الجنه..
هستفاد ايه بمتعه مؤقته محدوده
واضيع بسببها نعيم أبدى...
لو كانت الدنيا كلها تسوي عند ربنا جناح بعوضه مكانش خلي كافر يتهنى فيها...
لكن الدنيا دي طرفه عين..
ففكر في الدنيا على أنك عابر سبيل وانها مجرد دار اختبار وامتحان
ياتنجح ياتسقط والعياذ بالله..
طيب هقولك حاجه
ايه رأيك أن أقل واحد نعيما في الجنه عنده اكتر من نعيم الدنيا ومافيها ١٠ مرات...
ده بالنسبه لأشقى الناس في الجنه.!! .
متخيل احنا بنتخانق على ايه في الدنيا... والغفله اللي احنا فيها؟!
انا ليه اعصي ربنا واخسر سعاده أبديه فيها كل المتعه بدون اي عناء ولا شقاء..
ليه ماصبرش الكام سنه اللي عايشهم في الدنيا واتقي ربنا علشان خاطر جنه عرضها السموات والأرض..
فكر بعقلك.. أفلا تعقلون؟!
(اقرأ سوره {الإنسان} واستشعر النعيم اللي وعدنا بيه ربنا كل فتره)علشان تعرف النعيم اللي مستني المؤمنين حقا
ثالثا الحب.... حب الله عز وجل
وده هناخذه في درس لاحق ان شاء الله بالتفصيل اكتر..
يتبع......
#السائرون_الي_الله
#حي_على_الفلاح
#الاراده #العزيمه
الرئيسية 
